Nakilal-an na sang kapulisan ang suspek nga nagtiro patay sa isa ka indibidwal samtang duha ang napilasan sa Barangay Poblacion A, Dueñas, Iloilo sang tinalikdan nga Marso 23, 2026.
Nahibaluan nga involved sa sini nga insidente ang napatay nga si Marigold Jamelo, 49 anyos sang Zone 3, Barangay Tacas, Jaro samtang pilason ang driver kag mekaniko nga si Wilbert Auditor, 45 anyos sang San Enrique, Iloilo kag nasalabat naman sang bala sa tiil si Blondie Daquila, 42 anyos kag residente sang Poblacion A, Dueñas, Iloilo.
Sa interview sang Bombo Radyo kay PCapt. Francis John Layog, hepe sang Dueñas Municipal Police Station, ginpahayag sini nga nakilala sang isa ka testigo ang gunman.
Padayon naman nga ginapangita kag ginakilala ang apat ka mga kaupod sang suspek nga yara sa salakyan sang matabo ang pagpangluthang.
Suno pa kay Layog, ipasaka nila sa masunod nga Lunes ang kaso nga murder, frustrated murder kag frustrated homicide batok sa suspek.
Dugang pa sini, na-establisar sang imbestigasyon nga ang motibo sang krimen amo ang isyu sa kwarta.
Sa karon, padayon ang imbestigasyon sang Dueñas Municipal Police Station agud makilala kag madakpan ang apat ka iban pa nga suspek nga ginapatihan sakay sang pula nga salakyan nga gingamit sa krimen.
