SAN JOSE, ANTIQUE – Sampaw-sampaw nga kaso ang igapasaka batok sa suspek sang shootout sa Brgy. Atabay, San Jose, Antique.
Sa interview sang Bombo Radyo kay Police Lt. Col. Mark Anthony Darroca, hepe sang San Jose Municipal Police Station, iya ginpahayag nga posible buwas nga adlaw, mapasaka na ang kaso batok sa suspek nga si Venom Dio Mangilaya nga nagapabilin sa presuhan.
Suno kay Darroca, kaso nga 2 counts of murder, frustrated murder, 3 counts of assault with frustrated homicide kag damage to property ang posible ipasaka batok kay Mangilaya.
Ginpahayag ni Darroca nga yara naman sa maayo nga kahimtangan ang mga pilason nga sanday Police Staff Sgt. Cyril Valdevieso, Police Staff Sgt. Albert Talidong, lunsay na-assign sa San Jose Municipal Police Station kag Stephen Checa, correspondent sang isa ka local newspaper.
Sa subong suno sa hepe, indi pa niya mapat-ud kun bala may yara sang deperensya sa panghuna-huna si Mangilaya nga kun pamangkuton, ginahambal lang sang suspek nga gin-into siya sang mga biktima.
Magluwas diri, ginpahayag man sang natungdan nga may yara sang impulsive personality ukon madali nga maakig si Mangilaya matapos nga ginbalibaran sang biktima nga si Ana Anacleto.
Samtang, ginatun-an pa suno kay Darroca kun bala maulamid sa kaso ang amay ni Mangilaya.
Suno kay Darroca, Taurus 9MM ang gingamit sang suspek sa krimen samtang gilayon naman nga ginsungka sang amay ang iban pa nga mga armas kag mga bala nga wala sang lisensya.
Sa subong, yara na sa kustodiya San Jose PNP ang mga armas nga ginapanag-iyahan sang pamilya Mangilaya.
