Naga-guwa sa imbestigasyon sang pulis nga may personal nga motibo ang suspek sa shooting incident nga nagluntad sa sulod sang Ateneo de Manila University nga ginkamatay sang tatlo ka mga tawo.
Patay sa amo nga pagpangluthang si former Lamitan City mayor Rose Furigay, ang long-time aide sini nga si Victor Capistrano, kag ang university security guard nga si Jeneven Bandiala.
Pilason naman ang 25-anyos nga anak ni Furigay nga si Hannah nga magatambong kuntani sang iya graduation ceremony sa College of Law sa amo nga unibersidad sang natabo ang amo nga insidente.
Gin-identify sang Quezon City Police District (QCPD) ang suspek nga si Chao-Tiao Yumol, 38, isa ka medical doctor nga taga-Lamitan City, Basilan.
Suno kay QCPD director Police Brigadier General Remus Medina, nag-file anay ang Furigays sang 76 cyber libel cases batok kay Yumol.
Suno kay Medina, “nagpapalitan na sila ng kaso kaya lumalabas personal ang away nila. Kaya hindi siya makapag-practice as doctor. Isa yun sa mga motivations niya.”
Suno naman kay Atty. Quirino Esguerra, abogado ni Furigay, wala sang kamatuoran ang pahayag sang suspek nga ginpatay sini ang anay alkalde bangud sa kahilabtanan sini sa illegal drug trade.
Suno sa abogado, 2018 pa lang, may mga akusasyon na nga ginapang-post si Yumol batok sa kay Furigay nga amo ang rason kun ngaa nagpasaka ang anay alkalde sang cyber libel cases batok sa iya.
Ginpahayag man sang legal counsel nga akig ang suspek kay Furigay bangud sa pagpasirado sang clinic malapit sa Lamitan City Hall.
Sa dalagan sang imbestigasyon, ginapahayag nga nagsakay si Yumol sa ride-hailing car padulong sa campus kag dala sini ang iya duha ka firearms.
Base sa ebidensya suno sa pulis, yara na sa lobby ang gunman kag sang nagsulod ang biktima, ginsugata sang lupok. Ginluthang man kag napatay ang guwardiya. Gina-imbestigaran pa subong kun sin-o ang nakatiro sa suspek bangud nakaangkon man ini sang pilas.
Gina-usisa man sang pulis kun paano nakalusot ang armas-luthang sang suspek apang sa may inisyal nga mga pahayag nga wala na-inspect ang salakyan. May nakuha ang mga pulis nga duha ka pusil kag mga bala gikan sa suspek. Ginapahayag nga may silencer man ang gingamit sini nga armas.
Under control na subong ang sitwasyon sa ADMU suno sa pulis. Ginsaad man nga isa ini ka isolated case kag indi makaapekto sa seguridad sa una nga State of the Nation Address ni President “Bongbong” Marcos Jr. buwas, Hulyo 25. ##
