ILOILO CITY – Napasaka na ang kaso nga rape with homicide batok sa suspek nga nagpatay kag ginapahayag naghimulos sa walo ka tuig nga bata nga babaye sa Barangay Sarapan, Passi City, Iloilo.
Suno kay Iloilo Provincial Police Office (IPPO) director S/Supt. Marlon Tayaba, madamo sang inconsistencies sa pahayag sang suspek nga si Harlie Condada kaangay sang dugo nga nakit-an sa shorts kag bayo sini nga sa iya pagpahayag, nalamhit lang sang mga dahon nga nalabyan niya.
Madamo man suno kay Tayaba sang pahayag ang suspetsado nga indi mapatihan.
Sa karon hugot nila nga ginabantayan ang suspek tungod posible nga halitan sini ang kaugalingon.
Samtang, fatal nga pilas sa li-og tuga sang pagkalabo ang gintunaan sang kamatayon sang biktima.
Suno kay Dr. Owen Lebaquin, medico legal officer, nalab-ot gid ang spine sang biktima sang ini ang ginlabo sa li-og.
Santu sa resulta sang autopsy examination, magluwas sa fatal nga pilas sa li-og, nag-angkon man ini sang multiple hack wounds ukon ginhatok-hatok sang labo.
Posible man suno kay Lebaquin nga gin-abuso sekswal sang suspek ang biktima sa diin ginsudlan sang matig-a nga bagay ang kinatawo sang bata apang indi matumod kun mismo ang kinatawo sang suspek ang gin-gamit.
Nagaguwa man suno kay Dr. Lebaquin santu sa mga pilas kag marka sa lawas sang biktima, nga buhi pa ini ukon ginlipong sang ginhimo ang pagpang-abuso sekswal.