THAILAND – Indi pa makumpirma kun bala may Pilipino nga naulamid sa kapin 30 nga napatay kag kapin 40 nga napilasan sa mass shooting incident sa Nakhon Ratchasima, Thailand.
Sa Good Morning Philippines program kay Bombo International Correspondent Cleo Rose Jondonero, Overseas Filipino Worker sa Thailand kag miyembro sang Bombo Alumni Association, ang suspek ang natumod nga isa ka suldado kag nakilala nga si Sergeant Major Jakrapanth Thomma nga nasapwan nga patay sa sulod sang Terminal 21 Korat.
Suno kay Jondonero, naatrasar ang pagtumod sang otoridad kun sa diin ang exact location ni Thomma bnagud nga ginguba ang tanan nga Closed Circuit Television apang una nila nga nasulod ang ground floor sang Terminal 21 Korat.
Ginpahayag ni Jondonero nga wala nangin madali ang pagsulod sang otoridad sa mall bangud nga may yara sang gina-uyatan nga granada si Thomma.
Nauna na nga ginpahayag sang otoridad nga ang suspek lamang ang nabilin sa sulod sang mall apang sang ila nga nasulod ang iban nga panalgan sang Terminal 21 Korat, nakita nila ang walo ka hostages, apat ka bangkay sang mga biktima nga naulamid sa mass shooting kag ang bangkay sang suspek.
Antes pa man ang mass shooting, ginpahayag ni Jondonero nga nakabais sang suspek ang iya commanding officer kag duha ka iban pa antes ginkuha ang isa ka armas kag mga bala gikan sa military camp.
Una nga nagpangluthang si Thomma sa isa ka Buddhist temple sa Terminal 21 mall kag naka-post pa sa Facebook ang suspek kun sa diin iya ginpamangkot sa netizens kun bala magasungka siya ukon indi.
Isa ka adlaw antes ang mass shooting, nagpost man si Thomma sa Facebook sang mga tinaga nga “Death is inevitable for everyone.”
Magluwas diri, ginpakigbahin man sang suspek ang laragway kun sa diin makita nga may gina-uyatan siya nga armas-luthang.
May kaangtanan diri, nagpalab-ot sang pagpakig-unong si Thai Prime Minister Prayuth Chan-ocha sa pamilya sang mga biktima.
