Naga-guwa nga obsessed sa ideya sang pagpatay sang mga kabataan ang suspek sa latest shooting incident sa isa ka simbahan sa Minneapolis, Estados Unidos sang Amerika.
Suno kay Minneapolis Police Chief Brian O’Hara, napatay sang 23-anyos nga suspek nga si Robin Westman ang duha ka kabataan kag 18 pa ang pilason apang wala sang nakit-an nga klaro nga motibo sa krimen sa Annunciation Catholic Church.
Pahayag sang pulis, daw kaangay nga nagapakita ang suspek nga may kaugot ini sa tanan, kag labaw pa diri, luyag sini patyon ang mga kabataan.
Ginpahayag man sang suspek ang iya kaugot sa madamo nga mga grupo lakip na sa Jewish community kag kay US President Donald Trump. Base kay Acting US Attorney Joe Thompson, ang videos kag writings nga ginbilin sang assailant ang nagpabutyag sang “hate towards almost every group imaginable”, lakip na sa Mexicans, Christians, kag Jews.
Apang kun may grupo man suno sa iya nga wala naugot ang suspek, ini amo ang “school shooters” kag ang “mass murderers.” Pahayag ni Thompson, gina-idolo pa sang suspek ini nga mga notoryus nga grupo.
“The shooter was obsessed with the idea of killing children”, pahayag sini.
Ginlaragway naman sang Federal Bureau of Investigation ang amo nga atake bilang isa ka akto sang domestic terrorism.
Naguwa man sa imbestigasyon nga wala sang criminal record ang assailant. Antes ang krimen, nagbakal ini sang tatlo ka mga pusil.
Natukiban man nga nag-eskwela anay ang shooter sa Catholic school nga naangot man sa simbahan kun sa diin ini nagpangluthang.#
