𝗣𝗔𝗩𝗜𝗔, 𝗜𝗟𝗢𝗜𝗟𝗢 — Magapangatubang sang suspension ukon revocation sang driver’s license ang driver sang sports car nga nakabunggo-patay sang isa ka indibidwal sa Brgy. Pandac, Pavia, Iloilo.
Ang suspek amo si Bobot Dela Rosa, residente sang Calinog, Iloilo.
Sa amo nga insidente, patay gid si Rave Garcia, 33, samtang pilason naman ang asawa sini nga si Shefryl, 23, lunsay residente sang Brgy Onate De Leon, Mandurriao, Iloilo City.
Sa interview sang Bombo Radyo kay Jonas Torres, Public Information Officer sang Land Transportation Office (LTO) Region 6, iya ginpahayag nga sa subong, wala pa ang ahensya sang may ginakaptan tuhoy sa identity sang driver nga nakabunggo sa mga biktima.
Suno kay Torres, indi man sila makadagdag sang show cause order batok sa driver bangud sa wala sila sang pangalan nga gina-uyatan ilabi na nga may posibilidad nga lain ang tag-iya, lain man ang ga-drive.
Ginpahayag man ni Torres nga nakadependi sa gihapon sa resulta sang imbestigasyon sang kapulisan ang ila mangin masunod nga tikang.
Nahibaluan nga halin ang mag-asawa nga biktima sa Mandurriao kag pakadto kuntani sa Brgy. Balabag, Pavia sakay sa ila nga mountain bike.
Base sa testigo, may natabo nga pagbinaisay sa tunga sang driver sang pribado nga salakyan kag sa lalaki nga biktima bag-o natabo ang pagbunggo kun sa diin hungod nga ginlasak sang salakyan ang mga biktima.
Posible naman nga pasakaan sang Pavia Municipal Police Station sang kaso nga murder, frustrated murder kag malicious mischief ang suspek nga nagbunggo-patay sa sa isa ka indibidwal sa Brgy. Pandac, Pavia, Iloilo.
Ang suspek amo si Bobot Dela Rosa, residente sang Calinog, Iloilo.
Sa amo nga insidente, patay gid si Rave Garcia, 33, samtang pilason naman ang asawa sini nga si Shefryl, 23, lunsay residente sang Brgy Onate De Leon, Mandurriao, Iloilo City.
Sa interview sang Bombo Radyo kay Police Colonel Bayani Razalan, Officer in Charge sang Iloilo Police Provincial Office (IPPO), iya ginpahayag nga posible subong nga hapon ukon buwas nga adlaw mapasaka ang kaso batok sa ginapahayag negosyante nga suspetsado.
Suno kay Razalan, ginapreparar na sang otoridad ang mga documentary evidence and statements batok sa suspek agud matigayon na nga mapasaka ang kaso.
Gin-athag man ni Razalan nga nadugayan ang dalagan sang kaso bangud man sa pagpangita sang witnesses sa diin, ginpreparahan man ang documentary requirements agud masigurado nga bug-at ang kaso nga ipasaka sa suspek.
