Nakilala na ang mga suspek sa pagbuno-patay kay Delfin Donito Jr. sa Infante Drive, Barangay San Felix, City Proper, sang Hulyo 26.
Sa interview sang Bombo Radyo kay Police Captain Michael Tuburan, hepe sang Iloilo City Police Station 7, iya ginkumpirmar nga natukoy na sang kapulisan ang pagkakilanlan sang duwa ka suspek apang wala pa ginpangalanan bangud padayon pa sa gihapon ang ila imbestigasyon.
Suno kay PCapt. Tuburan, ang isa ka lalaki nga suspek residente sang Lapuz Norte, samtang taga Boulevard, Molo naman ang babayi.
Nahibaluan man nga maglive-in partners ang duwa.
Padayon pa ang imbestigasyon sang kapulisan agud matukoy ang pagkakilanlan sang isa pa gid ka lalaki nga ginapatihan nga upod sang duha sa insidente.
Dugang pa ni Tuburan, dako ang nabulig sang cartographic sketch nga ginpagwa sang kapulisan sa pagkilala sang mga suspek.
Sa karon, nagapadayon ang follow-up operation sang mga otoridad, lakip na ang proseso sa pagpasaka sang kaso kag pagtukoy sang posible nga motibo sa krimen.
By: 𝑩𝒐𝒎𝒃𝒐 𝑲𝒓𝒚𝒍𝒍𝒆 𝑴𝒆𝒍𝒍𝒊𝒛𝒂
