Nagsungka na sa kapulisan ang suspek sa pagbuno-patay sa persona nga nagluthang-patay man sa iya utod sang Nobyembre 1, sa Brgy. Binolosan Pequeño, Calinog, Iloilo.
Ang nadakpan amo si Alan Calderon, 38-anyos, samtang ang napatay sini amo si Edmundo Cardioleta, 34-anyos, lunsay residente sang nasambit nga barangay.
Sa interview sang Bombo Radyo kay Police Major Myles Dieron, hepe sang Calinog Muncipal Police Station, iya ginpahayag nga matapos ang pila ka adlaw nga hot pursuit operation, nakakuha sila sang impormasyon nga nagbalik na si Calderon sa ila balay rason nga ginbalikan liwat sang kapulisan ang area.
Suno kay Dieron, nagsungka nalang man ang suspek kag gintu-ad nga bangud sa kakulba matapos nabuno ang paryenti niya, nagpalagyo ini gilayon.
Dugang pa sang natungdan, nag-istoryahanay naman ang mga pamilya sang imbulbado kag ginkasugtan nga indi na magpasaka sang kaso bangud magparyentihanay man ang mga ini kag sa rason nga napatay man ni Cardioleta ang utod ni Calderon sang natiruhan niya ini.
Yara subong sa Calinog Municipal Police Station si Calderon kag ginahulat pa ang pagfile sang affidavit of non-interest sang pamilya sang biktima nga indi na magpasaka sang kaso nga homecide batok sa natungdan.
