Ginkumpirma sang Iloilo City Police Station 4 nga nagpahibalo ang suspek nga magasungka ini kasunod sang pagsulod sa balay kag pagbuno sa mag-asawa nga ila kasilingan sa Brgy. East Baluarte, Molo, Iloilo City.
Sa interview sang Bombo Radyo kay Police Captain Ryan Christ Inot, hepe sang estasyon, iya ginpahayag nga antes pa man nagtawag si Erwin Zalabate sa iya pamilya agud kuntani mag-surrender, na-file na nila ang panumbungon.
Suno kay Inot, indi naman nila mahimo madakop ang suspek bangud nga nagtakop na ang hot pursuit operation.
Sandig sa procedure suno sa police, hulaton na lang nga magpaguwa ang korte sang arrest warrant kasunod sang complaint nga frustrated homicide, kag pananglitan ma-isyu na ang warrant, arestuhon ang lalaki.
Ginpahayag man ni Inot nga sa area sang Tapaz, Capiz nagpalagyo ang suspek matapos ang nagluntad nga stabbing incident.
Nahibaluan nga ang amay sini nga si Eliseo, 60, ang naka-detain subong bangud sa ginaalegar nga kahilabtanan man sini sa insidente.
Kun balikan, ang mga biktima sa pagpamuno amo sanday Rolando, 58 anyos, kag iya asawa nga si Fatima, 54 anyos, lunsay residente man sang Barangay East Baluarte.
Ginpahayag nga ginsulod sang mga suspek ang puluy-an sang mga biktima samtang nagakatulog ang mga ini kag gipangbuno. Matapos ang krimen, natigayon nga makapalagyo ang anak nga suspek samtang nadakpan naman ang amay sini.
STATEMENT SANG AMAY
Nagpanindugan naman ang amay nga wala siya sang partisipasyon sa krimen.
Sa interview sang Bombo Radyo kay Eliseo, ginpahayag sini nga lunsay alegasyon lang sa pihak nga kampo ang statement nga nagsulod man siya sa balay sang mag-asawa kag ginhawiran ang lalaki nga biktima.
Suno kay Zalabate, nagakatulog na siya sang amo nga gab-i kag ginpukaw lang siya sang nagpauli ang iya bata nga si Erwin agud magkuha sang kutsilyo.
Pahayag sini, naglagas matuod siya sa iya bata, apang ang iya tuyo amo nga punggan ini bangud indi man niya ini luyag mangin criminal.
Gindugang man sini nga nadala pa niya pauli si Erwin kag nagatuyo pa nga magtawag sang pulis, apang gin-alegar nga madasig ini nga nagpalagyo.
Wala man sang nasugid si Erwin sa iya ginikanan kun ano ang atraso sang mag-asawa, apang posible suno kay Eliseo nga na-impito ang iya bata bangud masami nga naga-video ang mag-asawa sa ila nga mga nagatambay sa dalan.
