ILOILO CITY–Nagsungka sa mga otoridad paagi sa Bombo Radyo ang suspek sa pagbuno, paglabo kag pagulgol-patay sa 16 anyos nga dalagita sa Zacarias Subdivision, Cabatuan, Iloilo.
Sa exclusive interview sang Bombo Radyo kay Luisa Cataluña sang Brgy. Cahigon, Calinog, Iloilo, iya ginpahayag nga nag-abot sa ila balay kahapon sang hapon ang suspek nga si Gringgo Morales, 25 anyos sang Brgy. Bagongbong, Dueñas, Iloilo kag nagpakilala nga iya himata.
Gin-ako ni Cataluña nga bisan siya ang wala nakakilala kay Morales nga iya pakaisa bangud nga nagdako sila sa magkatuhay nga lugar.
Sang iya nga ginpamangkot si Morales, didto na niya nahibalu-an nga ginpatay ni Morales si Ariza Mayormente sa Cabatuan, Iloilo.
Nagpahayag pa suno sa iya si Morales nga magpalagyo sa ila himata sa Sitio Cristobal nga nabukid na nga bahin sang barangay.
Iya nga ginlaygayan ang pakaisa nga magsungka na lang agud nga indi na madugangan ang iya sala.
Mismo si Morales ang naghambal sa iya nga magasungka lamang sa otoridad paagi sa Bombo Radyo para sa iya seguridad.