Napasakaan na sang kaso nga Rape with Homicide ang suspek sa paghimulos kag pagpatay sa hinablos sini sa Brgy. Owak, Calinog, Iloilo.
Ang biktima ginkilala kay Alyas Ice, 18 anyos, kag isa ka volleyball player.
Samtang, ang suspek amo si alyas Bok, 27 anyos, tumandok sang amo man nga lugar kag pakaduha sang iloy sang biktima.
Sa interview sang Bombo Radyo kay PMaj. Myles Dieron, hepe sang Calinog Municipal Police Station, ginpahayag sini nga natigayon nga mapasakaan sang kaso ang suspek kahapon nga adlaw Pebrero 7, 2026.
Ginahulat pa sa gihapon ang resulta sang DNA test sang suspek.
Madumduman nga una gin-alegar nga nagpanginmatay ang biktima bangud sang laslas sa iya kamot.
Apang sang ginpaidalom ini sa autopsy didto nakumpirma nga ginhimuslan ang biktima antes ini nga ginpatay.
Nagsungka naman ang suspek sa kapulisan kag gin-ako ang krimen nga iya ginhimo.
Nahibaluan nga temporaryo nga nagatinir ang dalaga sa iya lolo matapos mag-untat sa pag-eskwela, bangud ginkuha anay ini sang iya iloy halin sa iya amay sa Capiz agud may upod ang lolo sini sa Calinog.
Sa subong, yara na ang suspek sa kustodiya sang Calinog Municipal Police Station.
