BAROTAC VIEJO, ILOILO – Pasakaan sang nagakaigo nga kaso ang 30 anyos nga suspek matapos ginkuga-patay ang 16 anyos nga dalagita sa Brgy. San Lucas, Barotac Viejo, Iloilo.
Sa interview sang Bombo Radyo kay Police Master Sergeant Rodolfo Prudente, imbestigador sang Barotac Viejo Municipal Police Station, iya ginpahayag nga matapos ang pila ka oras nga hot pursuit operation, nadakpan ang suspek nga ginkilala kay Bernard Dumacod alyas Alog, tumandok sang Cabuyao, Laguna apang temporaryo nga nagatinir sa Brgy. San Lucas sa banwa sang Barotac Viejo.
Suno kay Prudente, residente sang Brgy. Vista Alegre sa nasambit nga banwa ang live-in partner ni Dumacod apang bangud sa personal nga rason, naga-istar sa isa ka payag sa idalom sang taytay ang suspek nga masami lamang naga part time sa bisan ano nga trabaho.
Ginpahayag ni Prudente nga mismo ang abyan ni Dumacod ang nag-report sa ila tuhoy sa natabo kag bangud sini, gilayon nga nagresponde ang mga pulis sa crime scene kun sa diin nadugayan pa antes nakita ang bangkay sang biktima nga si Jenevee Balleza Carrera gintabunan sang hilamon.
Gin-athag sang imbestigador nga may yara sang panapton ang biktima sang ini ang nasapwan apang sang ila ginpadulungan ang payag, nakapalagyo na si Dumacod kag sa bulig sang iya abyan, nadakpan ang suspek sa Brgy. Buntatala, Jaro, Iloilo City.
Antes pa man ang insidente, ginapahayag nga nakita pa nga ginsundan sang suspek ang biktima.
Natalana nga ipaidalom sa autopsy examination ang bangkay sang 16 anyos nga dalagita nga naka-angkon lagub sa liog kag face deformity.
May palatandaan man nga nagbato ang biktima matapos naka-angkon sang kinarusan sa lawas ang suspek.
