DUMANGAS, ILOILO – Wala pa sa gihapon madakpan ang suspek nga nagluthang-patay sa isa ka senior citizen sa Sitio Sapa, Brgy. Patlad, Dumangas, Iloilo.
Ang biktima amo si Freddie Erbite, 68 anyos samtang ang suspek naman amo si Jeffrey Didal, 44 anyos lunsay sang nasambit nga lugar.
Sa interview sang Bombo Radyo kay Police Senior Master Sergeant Kim John Banzon, imbestigador sang Dumangas Municipal Police Station, iya ginpahayag nga bangud lamang sa tuman ka gahod nga tambutso sang motorsiklo ang gin-awayan sang duha.
Suno kay Banzon, magkasilingan man lang ang duha apang ginsita ni Erbite si Didal bangud sa tuman ka gahod nga tambutso kag ini ang rason sang pagpangakig sang suspek.
May pagbaisay nga natabo tubtub nga kaina sang aga, sang may ginbakal sa tiyangge ang biktima, natabo ang pagluthang gamit ang 9mm pistol.
Gindala pa sa hospital ang biktima apang wala gid natabangan.
