Nagsungka na kahapon, Nobyembre 24, sa kapulisan ang suspek nga nagpadala sang bomb threat sa Oton National High School.
Matandaan nga nakabaton sang pagpamahog sa amo nga eskwelahan sang Nobyembre 21 nga naghatag sang kakugmat sa mga estudyante, manunudlo kag mga ginikanan.
Sa interview sang Bombo Radyo kay Police Colonel Bayani Razalan, director sang Iloilo Police Provincial Office (IPPO), iya ginpahayag nga gin-ako mismo sang suspek nga siya ang nagpalapta sang bomb threat sa nasambit nga buluthuan.
Suno sa iya, na-detect nila ang Facebook account nga gin-gamit sang suspek sa pagpanguna sang Regional Anti-Cybercrime Unit (RACU).
Natumod nga ang tag-iya sang nasambit facebook account amo mismo ang utod nga babayi sang suspek kun sa diin deactivated na kuntani ang account apang natigayon pa niya ini nga mabuksan.
Pahayag pa ni Razalan, ginsiling sang suspek nga lango-lango lang kuntani kag wala sang intensyon ini nga malain bangud wala man siya sang kaakig sa buluthuan sa diin anay ini naga-eskwela.
Text: Joedel Nollaga
