ILOILO CITY – Posible nga may yara sang hiligut-anon sa electoral system sang Japan ang suspek sa explosives attack kay Prime Minister Fumio Kishida.
Ini bangud nga napaslawan ini nga ma-qualify bilang kandidato sa upper house election sang nagligad nga tuig.
Ang 24 anyos nga si Ryuji Kimura ang nagapabilin nga wala nagahambal matapos nga gin-aresto bangud sa paghaboy sang explosive device kay Kishida antes pa man maghatag sang speech ang prime minister sa syudad sang Wakayama sa western Japan.
Maswerte nga wala nasamaran si Kishida.
Suno sa record, nag-file si Kimura sang kaso sa Kobe District Court sang Hunyo sang nagligad nga tuig kag nagapangayo sang masobra sa P40, 000 bangud sa damages sa mental distress matapos nga wala nakalunsyar sang iya candidacy para sa House of Councillors election.
Suno sa iya, wala niya nalab-ot ang requirement nga edad nga 30 anyos kag nagabayad sang 3 million yen ukon P1.258 million deposit agud nga makapadalagan sa house election nga suno sa iya, nagalapas sa Constitution nga nagapasalig sang pag-alalangay sa idalom sang layi.
Suno naman sa pamilya ni Kimura, yara sa ila balay ang suspect tubtob sang gab-i sang adlaw sang pagpang-atake apang wala na nakita sang aga.
