Nadakpan na sang mga kapulisan ang suspek sa pagpangawat sang company phone sa isa ka pharmacy sa distrito sang Jaro.
Ang suspek amo si Roberto Salon, residente sang Hechanova Street, La Paz, Iloilo City.
Sa interview sang Bombo Radyo kay PCPT Gimel Acuesta, hepe sang Iloilo City Police Station (ICPS) 9, iya ginpahayag nga nadakpan ini pamaagi sa mga videos nga gin-post sa social media kasunod sang nakilal-an ini sang security guard sa La Paz kon sa diin naghampang pa sang Bingo.
Didto na kag ginreport sang Security guard sa La Paz Police Station kag gilayon man nga nakipag-angot sa ICPS 9 sa Jaro.
Suno kay Acuesta, gintudlo sang suspek nga sa banwa sang Sta. Barbara niya gindala ukon ginbaligya ang cellphone nga ginkawat.
Sa subong, yara pa ang imbestigador kag suspek sa banwa sang Sta. Barbara agud makipag-angot sa Sta. Barbara MPS kag pangitaon kon diin gindala ang amo nga cellphone.
Dugang ni Acuesta, kaso nga theft ang ipasaka sa suspek in-kaso nga magpasaka sang kaso ang amo nga pharmacy.
