ILOILO – Desidido nga magpasaka sang kaso sa suspetsado ang pamilya sang 19 anyos nga babayi nga ginhimuslan-patay sa Brgy. Abangay, Janiuay, Iloilo.
Ini matapos mabaskog ang testimoniya nga ginbuy-an sang isa ka 14-anyos nga si Alyas Toto nga nagatudlo sa iya amay nga si Rhegie Leviot bilang prime suspect sa nasambit nga krimen.
Sa interview sang Bombo Radyo kay Rolando Bravio, amay sang biktima nga si Ronalyn Bravio, nagahilibion nga nagapamangkot ini kon ngaa anak pa niya ang nahimuan sang krimen sang pakaduha man lang sini.
Sigurado si Bravio nga wala sa normal nga kaisipan ang makahimo sang makangilidlis nga krimen sang pagpatay sa iya anak, sa diin naga-kaya ini sa talamnan sang nasapwan ini, nahigtan sang sako sa liog, wasak ang ulo, kag may gapos sa tiil.
Nagapati si Bravio nga ginpilit lang sang suspek ang iya anak nga si Alyas Toto nga magbulig sa pagkumiter sang krimen, sa diin ini ang naga-uyat sang kamot sang biktima samtang ginahimuslan niya ini.
Mahimo siling ni Bravio nga ginpahog sang suspek si Alyas Toto nga patyon ini kon indi magkaooperar.
Suno kay Bravio, maayo man ang iya kaangtanan sa pamilya sang suspetsado sa ila barangay, apang dugang niya, nakaagi na ini nga nadakpan nga nagpanglingling.
Arestado kag preso subong sa Janiuay Police Station ang suspetsado.
Nahibaluan nga madamo pa sang ginatumod nga “pagpaliko-liko” sa imbestigasyon bangud tatlo ka suspetsado ang gintudlo ni Alyas Toto antes tumuron ang iya amay bilang matuod nga suspek, kag iya manb gin-ako nga imbolbado siya sa pagpanghimulos sa biktima bangud ginhagad siya sang iya nga amay.
