ILOILO CITY – Padayon pa nga ginapangita ang suspek nga nagluthang-patay sa lalaki sa Barangay Libot, Calinog, Iloilo.
Ang biktima amo si Nardo Basilio, 55, residente sang nasambit nga lugar.
Ang suspek amo si Nerio Castillejo, Sr., 70, sang amo man nga barangay kag nagabantay sa isa ka restaurant.
Sa interview sang Bombo Radyo kay Police Staff Sergeant Vincent Gascon, imbestigador sang Calinog Municipal Police Station, iya ginpahayag nga yara sa tyangge ang biktima upod sa iya nga bata sa tabuk sang restaurant sang nagpalapit ang suspek kag gintiro si Basilio kag nagpalagyo.
Sa imbestigasyon sang otoridad, nagasulod ang kabataan sang biktima sa gina-ubrahan nga restaurant sang suspek kag nagabaligya sang mani kag chicharon nga ginareklamo sa barangay.
Sang nagligad nga adlaw kuntani istoryahan ang reklamo apang isa ka adlaw antes sina, ginpatay na sang suspek ang biktima.
Patal nga pilas sa ulo ang naagum sang biktima nga gintuna-an sang iya kamatayon.
Sa subong, padayon pa nga gina-imbestigaran ang motibo sang krimen.
Nagpanawagan naman ang otoridad sa suspek nga magsungka na sa labing madali nga panahon.
