Suspek sa pagpanunto sa Ilonga paagi sa dating website, naaresto na sa Malaysia

ILOILO CITY – Naaresto na sang mga otoridad sa Malaysia ang nagpakilala nga British national nga nagpangilkil sa isa ka balo sa Buenavista, Guimaras sang kapin P40 million.
Ini ang ginkumpirmar ni National Bureau of Investigation special investigator John Catipunan sa interview sang Bombo Radyo.
Suno kay Catipunan, nagapakig-angot na sila sa Malaysia matapos madakpan ang suspetsado nga si Stephen Desmond Nelson, agud nga mabuligan ang biktima nga si alyas Mercy.
Suno kay Catipunan, 60 porsiyento nga mahimo mabalik ang kwarta sang biktima, apang kun wala na ang kwarta sa suspetsado, mahimo nga ang propiedad sini ang i-convert sa cash kag ibalik sa biktima.
Nahibaluan nga ginpamaligya na sang biktima ang iya mga propiedad agud ipadala ang kwarta sa suspek.
Halos naubos naman sini ang ginbilin sang iya bana nga P10 million pesos sa bangko.
Ang bana sang biktima ang anay engineer sa pinakadako nga oil company sa bilog nga kalibutan, mga apartments, residential houses sa Metro Manila kag kadutaan sa Mindanao.
Aminado ang NBI nga isa ini sa mabudlay nga kaso nga ila nauyatan.
Suno kay Catipunan, organisado ang grupo sang sindikato nga nagbiktima kay alyas Mercy.
Pahayag pa sini, sa ila pagpangusisa sa background sang suspetsado kag sang grupo sini, nagagamit ang mga ini sang 30 ka mga laragway sang nagkalain-lain nga nationality bilang profile pictures, para sa mahimo nila nga biktimahon.
Kadam-an sa mga miyembro sang grupo mga IT experts.