Gin-ako sang suspek sa pagpatay sa dalaga sa Ingay, Tubungan, Iloilo ang ginhimo nga krimen.
Ang suspek amo si Aljohn Jalbuna, 33-anyos, residente man sang amo nga barangay.
Si Jalbuna ang nagsungka sa otoridad subong nga aga.
Gin-ako ni Jalbuna nga ‘balong’ ini sang natabo ang insidente.
Ginpahayag ni Jalbuna nga nagtaklas siya sa bintana pasulod sa kwarto sang 18-anyos nga biktima nga si alyas Jeje agud kibuton ini.
Apang suno sa iya, bangud nagsinggit ang dalaga, napilitan ini nga tabunan ang baba sang dalaga.
Ginpanginwala naman ini nga ginsumbag niya ang dalaga, sa baylo, ginsiling niya nga nakabunggo sa salog ang biktima bangud sa ila pagpukutay samtang nagapanginpadlos ang biktima.
Wala naman sini gin-ako nga ginhimuslan niya ang biktima.
Baliskad ini sa resulta sang autopsy nga may mga pilas sa kinatawo kag alatrasan sang biktima.
Suno sa iya, matapos nalipong ang biktima, ginbutang niya ini sa ulunan kag ginhabulan.
Sunod, naggwa ini kag nagpauli sa ila balay.
Pagkasunod nga adlaw, nabatian sini ang balita nga napatay ang dalaga.
Bangud naghinulsol ini, nagsungka siya sa otoridad.
Nanindugan naman ini nga wala siya naluyag sa dalaga.
Nangayo naman ini sang pasensya sa pamilya sang biktima kag ginsiling nga ginahinulsulan niya ang ginhimo nga krimen.
