ILOILO CITY – May natumod na nga suspek sa pagpatay sa magtiyo sa Barangay Balabago Jaro, Iloilo City sa diin tadtad ang lawas sa pagluthang, nakabaklid ang kamot kag may packing tape pa ang baba kag mata sang mga biktima.
Ang magtiyo amo sanday Jemrode Eribal, 22 anyos kag Tristan Zacary Eribal, 19 anyos.
Sa interview sang Bombo Radyo kay Iloilo City Police Office (ICPO) Director Police Col. Martin Defensor Jr., iya ginapahayag nga may yara na sang ginasundan nga suspek ukon mga suspek ang kapulisan sa nagtiro patay sa magtiyo apang indi pa mahatag ni Defensor ang kumpleto nga detalye.
Ini man bangud nga mahimo makatuga sa pagkapaslaw sa pagpasaka sang kaso ukon pagkadakop sa suspek kun ipaguwa na ang detalye sa subong.
Apang suno kay Defensor, sa tion nga makapasaka na sang kaso batuk sa suspek sa masunod nga semana, tion naman nga mahatag na niya ang detalye ilabi na ang pangalan sang nagpatay sanday Jemrode kag Tristan.
Nagpangabay man si Defensor sa pamilya sang mga biktima nga bukas ini sa pagpamati sa i-tuad nila may kaangtanan sa pagpatay sa mga biktima.
Bukas nga magbulig ang mga kapulisan dugang pa sang ICPO Director agud nga mahatagan sang hustisya ang magtiyo nga Eribal.
