Ginakonsiderar sang San Joaquin Municipal Police Station ang posibilidad nga yara lang sa palibot ang suspek nga nagtiro-patay sa punong barangay sang Ginot-an, San Joaquin, Iloilo.
Kahapon sang kaagahon, Pebrero 26, sang nasapwan nga wala na sang kabuhi kag may igu sang bala sa dughan si Punong Barangay Richard Sapalo, 53.
Sa interview sang Bombo Radyo kay Police Captain Isagani Tabares, hepe sang San Joaquin Municipal Police Station, iya ginpahayag nga base sa ila pagpangusisa, pamilyar ang suspek sa balay sang biktima.
Ginalantaw nga naglabay ini sa likod nga porsyon sang balay bangud naghilay na ang cyclone fence kag may nakit-an man nga tapak sang tiil.
Nag-agi ang suspek sa kusina, nagdiretso sa kwarto sang biktima, didto na ini ginluthang, kag nagguwa liwat sa kun diin ini nag-agi pasulod.
Suno sa pulis, gina-isa-isa nila sa pagpamangkot ang mga kasilingan agud nga makabulig sa ila nga imbestigasyon.
Una na nga ginpahayag nga nakabaton na ang biktima sang pagpamahog sadtong bisperas sang Bag-ong Tuig.
May nabatian sa frequency sang handset radio sang barangay nga may nagsiling nga “Happy Condolence kay Kap Sapalo” apang wala sang may nakahibalo kun sin-o ang nagpadala sang amo nga mensahe.
Nahibaluan nga natabo ang pagpatay sa biktima sa adlaw mismo sang iya ika-53 nga kaadlawan.#
