ILOILO CITY – Padayon pa nga at-large ang suspek nga naglabo sa iya man lamang bayaw sa Barangay Fundacion, Pototan, Iloilo.
Ang suspek amo si Anthony Labiscase samtang ang biktima naman amo si Nolan Isidro, lunsay mga 49 anyos kag mga residente sang amo nga lugar.
Sa interview sang Bombo Radyo kay Police Staff Sergeant Raffy Gonzales, imbestigador sang Pototan Municipal Police Station, iya ginpahayag nga ginatinguha-an sang kapulisan nga hangyu-on sang pamilya ang suspek nga mag-surrender na.
Kung balik-balikan, hubog nga nag-abot sa ila balay si Isidro kag may natabo nga pagbina-isay sa tunga niya kag ni Labiscase.
Gintiklod pa sang suspek ang biktima nga rason sang iya pagkatumba.
Didto na kag nagkuha sang pang-ihaw nga kutsilyo ang suspek kag ginlabo ang biktima.
Gilayon ini nga nagpalagyo matapos ang krimen.
Ang biktima naman ang yara na sa estable ang kondisyon.
Sa imbestigasyon sang kapulisan, daan nga hiligut-anon ang ginalantaw nga motibo sang krimen.
Desido ang biktima nga magpasaka sang kaso bangud indi na niya maagwantahan ang masami nga panggarit-garit sang suspek sa iya ilabi na kun mahubog.
