Aprubado na sang Inter-Agency Task Force (IATF) ang ginrequest sang mga local chief executives sang Western Visayas nga pagpalawig sang temporaryo nga suspension sang inbound passengers nagikan sa National Capital Region ukon NCR plus bubble sa probinsiya sang Bulacan, Cavite, Laguna, Rizal, Cebu City kag Davao City padulong sa Rehiyon 6.
Ini ang santo sa hingyo sang mga local chief executives sa Western Visayas nga pagpalawig sang moratorium nga maga-umpisa kuntani subong nga adlaw Abril 11 tubtob Abril 17 apang gin-isol sang IATF agud makahatag sang prior notice sa tanan nga nagaplano nga magpadulong ukon nagabiyahe na padulong sa Rehiyon 6.
Sa interview sang Bombo Radyo kay Iloilo City Mayor Jerry Treñas, iya ginpahayag nga nagpadala sa iya sang reply letter si National Task Force Against COVID-19 Chairperson Secretary Delfin Lorenzana nga nagpabalo nga magaumpisa ang moratorium para sa mga Returning Residents kag Authorized Persons Outside Residence (APORs) halin sa NCR plus bubble, Cebu City kag Davao City padulong sa Western Visayas umpisa Abril 13 tubtob Abril 19.
Apang gin-athag ni Treñas nga ang mga cargo pagwa kag pasulod sa Rehiyon ang nagakadapat nga magpadayon.
Indi naman sakop sang nasambit nga moratorium ang mga magapauli nga Overseas Filipino Workers (OFW) sa Western Visayas.
