ILOILO CITY–Nadakpan na sang Iloilo City Police Office (ICPO) ang 28 anyos nga utok sa asud-asud nga bomb threat sa syudad sang Iloilo.
Ang suspek ang ginkilala kay Alyas Vic, 28 anyos sang Molo, Iloilo City kag ginapahayag may deprensya sa panghuna-huna.
Sa interview sang Bombo Radyo kay Brother Kano sang isa ka religious group sa syudad sang Iloilo, iya ginpahayag nga mga 10 na ka tuig nga nagasimba sa ila relihiyon ang suspek nga si alyas Vic.
Sa 10 ka tuig nila nga pag-updanay sa simbahan, ginpahayag ni Brother Kano nga wala siya makahibalo kun sa diin naga-istar sa distrito ang suspek.
Ginapahayag nga sa facebook man na-trace ang suspek sa asud-asud nga bomb threat sa syudad.// Ginpahayag dugang ni Brother Kano nga nagapatigayon pa sila sang prayer meeting sa distrito sang Molo sang gindakop si alyas Vic.
Samtang, ginkumpirma ni Police Superintedent Jonathan Pablito, hepe sang Police Station 1, nga ila nadakpan ang suspek sa asud-asud nga bomb threat sa syudad.
Sa interview sang Bombo Radyo kay Pablito, nag-ako si Alyas Vic, 28 anyos, nga siya ang nagpadala sang bomb threat sa University of San Agustin sa General Luna Street Iloilo City kag sa isa pa gid ka unibersidad sa Jaro, Iloilo City apang ini ang wala man ginpabalo sa publiko.
Ang suspek suno kay Pablito ang may special need.
Usisa-on pa suno kay Pablito ang mga ginikanan ni Alyas Vic sang Molo, Iloilo City tuhoy sa insidente.
Gina-usisa man sa ICPO ang laptop ni Alyas Vic para sa dugang nga ebidensya.