Nagbulid-bulid sang tatlo ka beses kag nagkaya ang isa ka ‘Sports Utility Vehicle’ ukon SUV matapos nga nabunggu-an sang isa ka de-pampasahero nga jeep sa dalan sang Brgy. Sta. Rosa Laguna, Guimbal, Iloilo.
Sa interview sang Bombo Radyo kay Police Lieutenant Lario Esposo, hepe sang Guimbal Municipal Police Station, iya ginpahayag nga ma-overtake kuntani ang jeep sa isa ka motorsiklo apang, naglapaw ini sa iya nga linyada rason nga nabunggu-an sini ang nasumalang nga SUV.
Suno kay Esposo, padulong kontani sa Miagao, Iloilo ang de-pampasahero nga jeep apang, nalab-ot sang likod nga bahin sini ang SUV rason nga nagbunggu-anay ang duha ka salakyan.
Gin-athag man sang natungdan nga wala sang nasamaran sa bahin sang SUV kag mga pasahero sang jeep.
Apang, nag-angkon sang minor nga mga pilas ang driver sang motorsiklo.
Yara na sa kustodiya sang Guimbal Municipal Police Station ang driver sang jeep kag ginahulat naman sang driver sang SUV ang schedule agud nga makapasaka sang legal nga kaso batok sa de-pampasahero nga jeep.
