Iloilo – Nagbaton sang positibo nga reaksyon kag pagdayaw ang isa ka manunudlo bangud sa sa ginhimo sini nga pagkungkong sang anak sang isa niya ka estudyante samtang naga-lecture.
Sa interview sang Bombo Radyo kay Mr. Neil Christian Amaca, part-time instructor sa West Visayas State University-Calinog Campus, iya ginpahayag nga ginapasugtan niya ang iya mga estudyante nga magdala sang ila mga anak, sa kondisyon nga indi ini makaistorbo sa klase.
Suno kay Amaca, wala ini sang nakit-an nga sala bangud nagahatag lamang ini sang konsiderasyon sa mga estudyante nga may yara sang mga anak.
Ginpahayag dugang sang natungdan nga nagalaom ini nga indi madulaan sang gana sa pagskwela ang iya mga estudyante agud malab-ot ang tagsa nila ka handom.
Matandaan nga nakuhan man ni Amaca ang atensyon sang publiko bangud sa estilo sini sa pagtudlo pinaagi sa pag-gamit sang dahon sang saging sa baylo nga papel sa paghatag sang quiz.
