Dako ang nangin bulig sang SWAT Team sa madali nga pagresponde sa nagluntad nga shooting incident sa Barangay Airport, Mandurriao, Iloilo City kagab-i.
Sa interview sang Bombo Radyo kay Police Major Shella Mae Sangrines, spokesperson sang Iloilo City Police Office (ICPO), iya ginpahayag nga nangin maayo ang performance sang mga kapulisan sa pagpamuno ni Police Captain Lester Oliveros, hepe sang Police Station 10, nga amo ang nag-negosyar sa suspek apisar nga nagbato man ini sang ulihi.
Suno kay Sangrines, ginapreparar na subong ang mga dokumento kag ebidensya para sa pagpasaka sang kaso batok sa suspek.
Ang amo nga suspek amo ang nagtiro-patay sa iya nga kasilingan kagab-i bangud sa daan nga hiligut-anon.
(AIRPORT MANDURRIAO 333)
Nahibaluan nga inoras ang ginlawig sang negosasyon apang nagpamalibad ang suspek sa pagsungka kag naghambal pa sa pulis nga alas syete lang siya sa aga maga-surrender bangud matulog ini anay.
Sang ginsulod na sang pulis ang iya balay sang nagsanaaw na, didto na kag nagbato ini paagi sa pagpalupok gani nga ginpalukpan man ini sang pulis kag ini ang nasamaran.
