Pormal na nga gin-anunsyo sang Finland ang intensyon sini nga magsulod sa North Atlantic Treaty Organization (NATO).
Gintawag ni Finnish President Sauli Niinisto nga historic day ang adlaw sang amo nga anunsyo nga natabo kapin tatlo ka bulan matapos ang pagpang-atake sang Russia sa Ukraine.
Baliskad ini sa polisa sang Finland sa military non-alignment ukon military neutrality sa sulod na sang 75 na ka tuig.
Apang rason sang presidente, kun mangin myembro ang pungsod sa nasambit nga military alliance, ma- maximize ang security sa ila nga lugar batok sa posible pagpang-atake sang Russia.
Ang Sweden naman, pungsod nga may yara man nga kaangay sang polisa sa military neutrality sa masobra duha ka siglo, ang ginalauman man nga may kaangay man nga announcement subong nga Lunes.
Una na nga nag-anunsyo ang ruling Social Democratic Party sang Sweden nga naghatag na sila sang go signal agud nga mag-apply man ang pungsod sa NATO.
Ang NATO membership ang kinahanglan nga aprubahan kag iratify sang 30 ka mga myembro sang amo nga military alliance.
Nagpasalig naman ang foreign ministers sang NATO countries nga yara subong sa Berlin nga may ihatag nga seguridad sa Finland kag Sweden samtang nga gina-ratify pa sang member states ang ila application sa NATO.
Ang proseso ang ginapahayag magalawig pa sang isa ka tuig.
