Naubos ni President-elect Donald Trump ang pito ka battleground states sa Estados Unidos sang Amerika sa ginpatigayon nga presidential election sang Nobyembre 5.
Natabo ini sang nakuha man sini ang southwest state sang Arizona nga amo ang katapusan nga nagdeklarar sang resulta matapos ang pila ka adlaw nga isipay sang boto.
Bangud sa 11 electoral college votes halin sa state, nagsaka sa 312 ang nakuha ni Trump ikumpara sa 226 ni Vice President Kamala Harris.
Antes pa man sini, klaro na ang kadalag-an ni Trump matapos una na-secure ang 270 electoral college votes nga amo lamang ang kinahanglanon para makabalik siya sa White House.
Isa anay ka Republican stronghold ang Arizona nga nagboto sa pula sa masobra 20 ka tuig apang nagbaliskad ini sang 2020 sang nalutos si Trump sa amo nga state sa kamot ni outgoing President Joe Biden.
Sang amo nga tion, 10,000 votes ang nagseparar sa duha ka mga kandidato.
Nahimo ni Trump ang sweep subong nga 2024 matapos nadag-an ang presidential race sa anum ka iban pa nga swing states nga amo ang Pennsylvania, Wisconsin, Michigan, North Carolina, Nevada kag Georgia.
