ILOILO CITY- Nagalain ang buot sang isa ka benepisyaryo sang Tulong Panghanapbuhay sa Ating Disadvantaged/Displaced Workers (TUPAD) Program sang Department of Labor and Employment bangud ang P3950 kuntani nga bayad sa iya, nahimo na lang nga P1975.
Sa interview sang Bombo Radyo kay alyas “Tol” sang Pototan, Iloilo, iya ginpahayag nga nalipay na kuntani siya sang nakabaton sang code halin sa DOLE para sa pag-claim sang iya sweldo nga inubrahan sa sulod sang 10 ka adlaw.
Suno sa iya, natingala siya nga ang iya nakuha nga kwarta ang katumbas lang sang 5 ka adlaw nga ubra.
Pahayag niya, wala man siya ginpaathagan kon ngaa tunga lang ang ginbayad sa iya.
Nahibaluan nga Disyembre pa niya ginapaabot ang bayad apang subong lang nga Agusto niya ini nakuha.
