Posible nga hawidan anay ukon indi pag-i-release ang sweldo ni Senator Bato Dela Rosa kasunod sang iya binulan na nga pag-absent sa iya trabaho.
Halin sang Nobyembre pa nga wala nagpakita sa Senado kag sa publiko si Dela Rosa kasunod sang mga report nga nagguwa na ang arrest warrant sang International Criminal Court batok sa iya.
Suno kay Senate President Pro Tempore Ping Lacson, padayon pa ang ila nga pag-istoryahanay ni Senate President Tito Sotto kun ano ang himuon, kag nalakip ang sweldo sa posible nga ipa-untat.
Apang dugang niya, kinahanglan pa ini nga tun-an bangud may mga patakaran nga nasakop sang Civil Service Law.
Nagadangat sa P290,000 tubtub sa P330,000 ang sweldo sang senador sa kada bulan magluwas pa sa allowances.
Una naman nga ginpahayag ni former senator Antonio Trillanes IV nga nagaplano ini nga mag-file sang ethics complaint batok kay Dela Rosa bangud sa iya padayon nga pag-absent.
Si Ombudsman Boying Remulla ang una nga nakamensyonar nga may arrest warrant na ang ICC batok kay Dela Rosa bangud sa nangin papel sini bilang PNP chief sang ginpatuman ang drug war.
