ILOILO CITY – Pagadugangan ni Iloilo City Mayor Jerry Treñas ang sweldo sang mga job hire sang Public Safety and Transportation Management Office umpisa sa masunod nga tuig.
Kadungan sang pagsinapol nga ginpatigayon ni Treñas kaupod ang mga job hire sang Public Safety and Transportation Management Office, Special Services Division, Task Force Anti-Squatting and Illegal Structures Unit kag mga police auxiliary, ginpahayag sang alkalde nga luyag niya hatagan sang pondo ang mga job hire.
Suno kay Treñas, kun sa subong, nagalab-ot lamang sa P400 ang sweldo sang mga job hire sa kada adlaw apang sa masunod nga tuig, magalab-ot na ini sa P500.
Magluwas sa pagdugang sa sweldo, luyag man niya nga baklan sang kalo kag raincoat ang mga job hire sang nasambit nga talatapan nga nagapatigayon sang Oplan Hawan kag nagapatuman sang Anti-Jaywalking kag traffic rules and regulations.
Ang ginahingyo lang sang alkalde amo nga magtrabaho sang maayo ang mga job hire.
Samtang, nagpasalamat naman si Mr. Jeck Conlu, pinuno sang Public Safety and Transportation Management Office, sa suporta nga ginahatag ni Treñas.
Sa interview sang Bombo Radyo kay Conlu, iya ginpahayag nga isa ka maayo nga balita ang ginbuy-an nga pahayag sang alkalde.
Bilang balos suno kay Conlu, iya nga ginapasalig nga magatrabaho sang maayo ang mga job hire sang Public Safety and Transportation Management Office.
