ILOILO CITY – Tinguhaan sang Department of Health (DOH) Region VI nga mahatag na subong nga semana ang sweldo sang mga medical frontliners nga gin-hire agud makabulig sa COVID-19 response sa Western Visayas.
Sa interview sang Bombo Radyo kay Dr. Marie Jocelyn Te, chief sa Emerging and Re-emerging Infectious Diseases kag COVID-19 spokesperson sang DOH Region VI, iya ginpahayag nga posible may yara lang sa kulang sa requirements rason nga nadelay ang paghatag sa sweldo.
Ini ang sabat sang talatapan kasunod sang ginpalab-ot nga problema sa Bombo Radyo kun sa diin ginapahayag nga duha na ka bulan nga wala nahatagan sang bayad ang mga nurse nga gin-hire kag nadesignar nga magtrabaho bilang health frontliners sa Bacolod City.
Suno kay Dr. Te, ginaproseso man gilayon ang bayad sa mga healh workers kun kompleto ang ila mga dokumento nga ginapasa.
“Ang patakaran sang aton nga HR, they have to complete their documents. Kun may namiss-out sila, they are informed. Dapat nila ipass, or pwede man na i-follow up nila para madasig ang pag-process sang salary,” pahayag ni Dr. Te.
Ang iban sa gin-hire ang magatapos na sang ila nga contract sa Nobyembre 5 suno sa health official.
