ILOILO CITY- Labi pa nga ginpahugtan sang Iloilo Provincial Government ang pagbantay sa mga borders agud mamonitor kag matapna ang pagsulod sang mga swine products gikan sa Eastern Visayas.
Ini matapos nagpagwa si Iloilo Governor Arthur Defensor sang Executive Executive Order No. 048, Series of 2021 nga nagadugang sa Eastern Visayas sa mga lugar nga dumilian nga magpasulod sang swine, swine semen, pork, pork products kag by-products sa Iloilo.
Sa interview sang Bombo Radyo kay Dr. Daryl Tabuada, Provincial Veterinarian, iya ginpahayag nga gin-abisuhan na ang kabanwahanan sa probinsya nga ginalakipan sang Ajuy, Anilao, Balasan, Banate, Barotac Nuevo,Barotac Viejo, Batad, Carles, Concepcion, Dumangas, Estancia, kag San Dionisio, ilabi na ang ila island barangays nga hugot nga bantayan ang posible pagsulod sang swine, swine semen, pork, pork products kag by-products gikan sa Masbate area.
Suno kay Tabuada, ang tanan nga livestock transport carriers nga nagasulod kag nagagwa sa Livestock “Oksyon” Market (LOM), Livestock Auction Market (LAM) kag livestock holding facilities,ang dapat magpaidalom sa maidi-id nga disinfection, kag magdala sang updated disinfection clearance nga ginpirmahan sang livestock technician ukon authorized personnel.
Samtang ang tanan nga couriers/forwarders ang ginpaandaman man sa pagtransport kag pagdeliver pasulod sa Probinsya sang Iloilo ang nasambit nga mga produkto gikan sa Luzon, Mindanao, Eastern Visayas, kag areas nga apektado sang ASF .
Nahibaluan nga ginadumilian man ang pagpasulod sang swine, swine semen, pork, pork products kag by-products gikan sa mga pungsod ukon teritoryo kaangay sang Latvia, Poland, Romania, Russia, Ukraine, Luxembourg, Belgium, Bulgaria, Moldova, Czech Republic, South Africa, Zambia, Hong Kong, Mongolia, Vietnam, Cambodia, Myanmar, Lao People’s Democratic Republic, South Korea, kag China.
