ILOILO CITY- Ginpaidalom sa duha ka semana nga lockdown ang bilog nga Sydney, Australia kadungan sang pagpatuman sang bag-o nga restrictions sa nasambit nga pungsod agud matapna ang COVID-19 outbreak sang mas makalalaton nga Delta variant nga una na-detect sa India.
Suno kay Bombo International Correspondent Denmark Suede direkta sa Australia,
masobra sa 110 COVID-19 cases sang infected sang Delta variant ang narecord humalin sang nagpositibo sa amo nga variant ang isa ka driver para sa international flight crew.
Ginpahayag ni Suede nga ang lockdown magalawig tubtob sa Hulyo 9 kag magasakop sang greater Sydney, Central Coast, Blue Mountains kag Wollongong.
Suno kay Suede, samtang ginapatuman ang lockdown, indi mahimo nga makagwa sa ila balay ang mga residente magluwas lang kon ang ila rason amo ang pagbakal saang pagkaon kag iban nga essential goods and services; medical care kalakip na ang pagpatublok sang Covid-19 vaccine; outdoor exercise nga tubtob sa 10 ka tawo lang ang mahimo mag-updanay; kag essential work ukon education.
Gindugang naman ni Suede nga bangod sa sitwasyon subong sa Sydney, nagpanic- buying ang mga tawo sa diin madasig nga nagkalaubos ang tissue paper sa mga supermarket.
May yara man sang nareport nga nabalian bangud sa pagdinaguso sang mga tawo sa mga supermarket agud magstockpile sang toilet paper bilang isa sa mga household essentials para sa mga Australians.
Nahibaluan nga napabilin sang Australia ang manubo nga rates sang COVID-19 transmission kag ini ang una nga lockdown sa Sydney humalin sang Disyembre 2020.
Bangod sa outbreak, gin-ulan sang kritisismo ang federal government bangud sa mahinay nga vaccine rollout.
Ginabanta nga masobra pa lang sa 3% sang adult population ang fully vaccinated kag kapin 25% sang Australians ang nakabaton sang first dose.
Natalana naman nga idonar sang Australia sa iban nga pungsod ang 20M doses sang Astrazeneca vaccines sa Oktubre apang wala pa sang detalye kon isa ang Pilipinas sa mga pungsod nga mahatagan.
Nahibalua nga ginphase-out sa Australi ang Astrazeneca sa diin ang mangin prayoridad nila nga vaccine amo ang Pfizer kag Moderna.
