SYDNEY, AUSTRALIA – Nagpositibo sa coronavirus disease 2019 ang ika duha nga Australian national nga nagbakasyon sa Pilipinas kag yara subong naka quarantine sa ospital sa Australia.
Sa interview sang Bombo Radyo kay Denmark Suede, nurse sa Westmead Hospital- ang pinakadako nga ospital sa New South Wales, iya ginpahayag nga Marso 3 sang nag abot ang babaye ginabanta 30 anyos sa Australia halin sa Pilipinas sakay sa Cebu Pacific.
Ang nasambit nga ospital amo ang referral hospital sa mga pasyente nga nagpositibo sa coronavirus disease sa New South Wales.
Suno kay Suede, limitado pa ang impormasyon nga ginahatag sang mga otoridad apang iya tsekyaron kun bala sa ospital nga iya ginatrabahuan gindala ang Australian national.
Pahayag niya, subong nga adlaw, may yara na sang na rekord ang Australia nga 100 ka mga pasyente nga nag positibo sa COVID-19 sa diin 4 na ang patay.
Ang may pinakamataas nga pasyente nga nagpositibo sa virus ang na rekord sa New South Wales nga may 55; ginasundan sang Queensland kag Victoria nga may tag 15; South Australia may pito; Wetsern Australia may lima; Tazmania may duha kag Northern Teritory may isa.
Samtang sa bahin naman sang apat ka mga napatay, isa diri ang pasahero sa Diamond Princess Cruise Ship kag ang tatlo ang na rekord sa Sydney.
Nagpasalig naman ang Federal Government sang Australia nga sabton ang 55% nga gasto sang tagsa ka state territories sang pungsod sa pagbakal sang mga equipment ukon bulong.
Base sa iya nga obserbasyon sa mga pasyente nga nagpositibo sa Coronavirus disease, nabudlayan ini nga magginhawa, naga eksperensya sang sore thoroat ukon pagpalanakit sang tutunlan kag paghilanat.
