Kasunod sang mga aktibidad sang Leni-Kiko tandem sa Iloilo, ang grupo naman nga nagasuporta nanday presidential aspirant Ferdinand ‘Bong-bong’ Marcos, Jr. kag vice-presidential aspirant Davao City Mayor Sara Duterte-Carpio ang magapadulong sa syudad kag probinsya sang Iloilo.
Naka-schedule ang sympathy caravan sa Disyembre 11.
Sa interview sang Bombo Radyo kay Passi City Vice Mayor Jesry Palmares, Iloilo provincial chairman sang Lakas-CMD, iya ginpahayag nga magahalin ang caravan sa Iloilo kag makapadulong pa pati sa syudad sang Passi.
Suno kay Palmares, ginahulat pa subong nga ipahibalo sa local leaders ang mangin plano sang partido sa national nga lebel. Ang Lakas-CMD amo ang isa sa mga partido nga nalakip sa UniTeam Alliance, alyansa sang apat ka mga partido nga nagasuporta sa tandem nanday Marcos kag Inday Sara sa 2022 elections.
Indi pa sigurado suno kay Palmares kun makasunod sanday Marcos kag Duterte-Carpio sa amo nga adlaw, apang ang maathag, magaabot ang duha antes patigayunon ang Dinagyang Festival sa Enero 2022.
Una na nga ginpahayag ni Iloilo City Mayor Mayor Jerry Treñas nga welcome sa syudad sang Iloilo ang tanan nga political parties kag ang ila nga mga aktibidad may kaangtanan sa eleksyon sa Mayo 2022. ##
