ILOILO – Magapatigayon sang seremonya ang Sta. Barbara, Iloilo subong las-8 sang aga sa plaza sang nasambit nga banwa.
Sa interview sang Bombo Radyo kay Sta. Barbara Mayor Dennis Superficial, iya ginpahayag nga ang selebrasyon ang maga umpisa sa pagpasaka sang isa sa pinakadako nga hayahay sang Pilipinas sa atubang sang Sta. Barbata municipal hall.
Matapos ang flag raising ceremony may yara sang patigayunon nga paghalad sa monumento ni Gen. Martin Delgado nga tumandok sang Sta. Barbara, Iloilo.
Si Delgado ang isa sa mga rebolusyonaryo nga heneral nga nagpamuno sang rebelyon batuk sa mga Español kag nagwagayway sang hayahay sang Pilipinas sa Sta. Barbara sang Nobyembre 17, 1898.
Ini ang labing una nga nakaguwa sa Luzon ang hayahay sang Pilipinas.
Mangin dinapit naman nga bisita sanday outgoing Iloilo Gov. Arthur Defensor Sr. kag anak sini nga si Gov. elect Arthur ‘Toto’ Defensor Jr.
Nagalaum naman ang alkalde nga may yara sang national officers nga magatambong sa nasambit nga kahiwatan.
Samtang maga upod man ang syudad sang Iloilo sa pagdumdom sang ika-121 nga tuig sa pagselebrar sang adlaw sang kahilwayan.
Sa interview sang Bombo Radyo kay Police Capt. Shiela Mae Sangrines, tagpamaba sang Iloilo City Police Office (ICPO), iya ginpahayag nga una nga magapatigayon sang separado nga flag raising ceremony subong nga aga ang ICPO kag maga upod man ini sa aktibidad sa Plaza Libertad sa pagpanguna sang Iloilo City Government.
Suno kay Sangrines, kabahin sa flag raising ceremony ang pagdumdum sa kahimuan sang mga baganihan agud nga maangkon ang kahilwayan nga gina-eksperyensyahan subong sang mga Pilipino.
Ginasigurado naman sang Philippine National Police (PNP) nga padayon sila nga mangin mabinantayon bangud isa ini sa pamaagi agud nga masiguro ang kahilwayan sang pungsod.
Maga-umpisa ang flag raising ceremony sang ICPO las-7 subong nga aga.
Samtang sa probinsya sang Iloilo magapatigayon man sang flag raising ceremony sa Sta.Barbara, Iloilo sa diin makit-an ang pinakadako nga hayahay outside sang Metro Manila.
