ILOILO – Ginpatpat nanday Iloilo Governor Arthur Defensor Jr. kag Iloilo City Mayor Jerry Treñas sa mga opisyal sang National Inter-Agency Task Force ang nagataas nga kaso sang COVID-19 sa syudad kag sa probinsya kag ang mga plano sang local government units.
Sa interview sang Bombo Radyo kay Governor Defensor, iya ginpahayag nga nadesisyunan nga dal-on sa Cebu ang backlogs sa Western Visayas Medical Center Subnational Laboratory agud mabuligan ang rehiyon nga mapadasig ang pagpagwa sang COVID-19 test results.
Suno sa gobernador, ini ang temporaryo nga solusyon nga ginpanugyan ni Presidential Adviser to the Visayas Secretary Mike Diño.
Matandaan nga una na nga ginkumpirma ni Western Visayas Medical Center Subnational Laboratory Chief Pathologist Dr. Stephanie Abello nga may 1,600 sila ka backlogs bangud nag-untat sang operasyon ang laboratory sang Agusto 11-15 matapos nagpositibo sa COVID-19 ang pila ka medical personnel.
Suno kay Defensor, ibyahe sa Cebu ang backlogs bangud may yara ang Cebu sang malapit nga testing facilities.
Indi naman required ang magapauli nga locally stranded individuals (LSIs) nga magpresentar sang negatibo nga resulta sang reverse transcription polymerase chain rection (RT-PCR) test.
Suno kay Defensor, sundon sang Iloilo Provincial Government ang mandu sang Department of the Interior and Local Government (DILG) nga Medical Clearance Certificate kag Travel Authority lang ang ipresentar sang LSIs.
Ang swab test ang patigayunon sang receiving LGU.
Nagdepensa si Defensor nga una na niya nga gin-require ang negative RT-PCR test results bangud luyag lang niya tamingan ang linibo ka taga-probinsya sang Iloilo ilabi na sa mga COVID-19 suspects nga halin sa mga high-risk nga mga lugar.
Bangud wala naman sang mahimo sa polisa sang national government, ginpahayag ni Defensor nga i-quarantine na lang kag i-swab test ang magaabot nga LSIs.
Liwat man nga ginpalab-ot nanday Governor Defensor kag Mayor Treñas sa national task force ang problema sa gulpihanay nga pag-abot sang mga returning overseas Filipinos kag locally stranded individuals.
Suno kay Defensor, mas maayo gid kun mapahibalo ang Iloilo Provincial Government inadlaw antes sang pag-abot agud makahanda man ang magasugat nga local government unit kag ang tiniran nga quarantine facility.
Sa bahin naman sang nagagutok na mga ospital sa syudad kag probinsya sang Iloilo, ginpahayag ni Defensor nga nagpasalig man ang National Inter-Agency Task Force nga magabulig sila sa pagpadala sang dugang mga katre para mapasangkad ang bed capacity sa mga ospital.
Magabulig man ang taskforce sa pag-padala sang dugang nga mga medical personnel nga mahimo maaugment sa mga COVID-19 hospitals sa syudad kag sa probinsya.
