ILOILO CITY- Mahilig ka bala mag-travel?
Kun ikaw magakadto sa iban nga pungsod ano ang ginahimo mo?
Sigurado gid nga nagakaon ikaw sa mga lugar nga ginalagawan mo.
Apang paano kun may yara sang ordinansa ang lugar nga imo kadtuan nga nagadumili sa pagkaon samtang nagalakat?
Interesado ka man bala sa gihapon nga magkadto?
Sa syudad sang Kamakura sa pungsod Japan, may yara sang ordinansa nga nagadumili sa mga pumuluyo ilabi na gid sa mga turista nga magkaon samtang nagalakat.
Suno kay Masa Hirokawa, tourism manager sang Kamakura, ginhimo nila ang nasambit nga ordinansa agud malikawan nga magdamo ang aksidente sa mga dalanon.
Dugang pa niya, luyag man nila malikawan ang mga basura sa dalan nga nagikan sa mga pagkaon nga ginakaon sang tawo samtang nagalakat.
Gani kun interesado ka nga magbisita sa Kamakura, Japan para sa imo nga bakasyon dumdumon nyo lang nga indi magkaon samtang nagalakat.
