Ginpasangkad na sang syudad sang Iloilo ang preparasyon batok sa posibilidad sang mabaskug nga linog kag tsunami nga mahimo magtupa sa tion sang worst-case scenario.
Nagpatigayon sang pagsinapol ang Iloilo City Disaster Risk Reduction Management Office kaupod ang iban pa nga mga opisina nga may kaangtanan sa emergency response agud mapabaskug ang kapasidad sang syudad sa pag-atubang sang dalagku nga kalamidad.
Sa interview sang Bombo Radyo kay Darwin Papa, Chief sang Iloilo City Disaster Risk Reduction Management Office, ginpahayag niya nga base sa mga historical nga datos, posible nga maghulag ang Negros Trench nga may kabaskugon nga 8.2 magnitude. Suno sa iya, ini nga linog mahimo magtuga sang tsunami nga ang kataason ginabulubanta ang kataason nga kaangay sang tatlo ka panalgan nga building (3-storey building), kag magaigu sa syudad sang Iloilo.
Ginsiling pa ni Papa nga may yara lamang sang 15 minutos nga escape time ang mga pumuluyo sa tion nga may tsunami nga magaluntad, rason nga ginpatigayon sang Oktubre 16, 2025 ang “Oplan Pangaman” ukon preparasyon para sa worst-case earthquake. Ginpabaskug diri ang mga preventive safety measure kag gin-review ang operational plan agud masiguro nga madasig kag maayo ang koordinasyon sa tion sang emerhensya.
Gin-updan sang City Disaster Risk Reduction Management Council ang aktibidad kag gin-check man ang kahimtangan sang mga building sa syudad. Ginlantaw man ang contingency plan base sa mga secondary hazards kag historical nga mga kalamidad pareho sang “Lady CayCay” nga natabo sang tuig 1948.
Suno kay Papa, available na ang mga rescue teams kag magahiwat sang orientation para sa structural operations kag pagrescue sa tion sang dalagku nga kalamidad. Ginpahayag man niya nga enough na ang mga volunteers, serbisyo, kag mga organisasyon nga magabulig sa emergency operations, kag napreparahan na ang tanan nga posibilidad.
Gin-review sang mga miyembro sang mga cluster sang City Disaster Risk Reduction and Management Council ang Operational Plan for Earthquake bilang kabahin sang pagpabakod sang kapasidad sang syudad sa pagresponder. Gin-organisar ini sang CDRRM Office sa Gaisano ICARE Center kag gin-updan sang mga cluster sang Critical Infrastructure; Logistics; Law and Order; Food and Non-Food; Public Information and Community Advocacy; kag Search, Rescue and Retrieval.
Ginpahayag man nga gin-upod ang syudad sa lima ka operational divisions para sa mas sentro nga tikang sa tion sang dalagku nga linog, halin sa search and rescue operations, evacuation site management, tubtob sa pagpanalipod sang critical infrastructure.
Ginalauman nga magahiwat sang mga orientation para sa Collapsed Structure Search and Rescue (CSSR), resource mapping, kag mga drills ang mga teams agud mapabaskug pa gid ang kahandaan sang syudad. Ginpahayag man ni Papa nga ipresentar sa kay Mayor Raisa Trenas ang mga plano kag magahiwat sang dugang nga training para sa mga personnel.
Nahibaluan nga ang Negros Trench isa ka aktibo nga subduction zone sa kasadpan nga porsyon sang Panay kag ginakabig nga isa ka “earthquake generator” nga may posibilidad nga makaapekto sa syudad sang Iloilo.
Reported by Bombo Hanna Andasa/ Bombohanay Bigtime
