ILOILO CITY – Gindesisyunan sang COVID-19 Team sang Iloilo City Government nga untaton ang pagbaton sang Returning Overseas Filipino (ROF), Locally Stranded Individuals (LSI) kag authorized persons outside residence (APORs) sa Iloilo City.
Sa exclusive interview sang Bombo Radyo kay Iloilo City Mayor Jerry Treñas, iya ginpahayag nga bangud sa kakugmat nga dala sang bag-o nga COVID-19 strain humalin sa UK, suspendihon ang pagsulod sang LSI, ROF kag APORs sa sulod sang duha ka semana.
Suno kay Treñas, magapaguwa man siya sang executive order nga indi makasulod sa syudad sang Iloilo ang LSI, ROF kag APORs kun indi magpaidalum sa swab test.
Dugang pa sang natungdan, siguraduhon man sang COVID-19 Team nga ang tanan nga magaabot kag magasulod sa syudad sang Iloilo ang safe kag negatibo sa nasambit nga virus.
