ILOILO CITY – Daku nga dungog para sa syudad sang Iloilo ang pagkilala nga nabaton gikan sa Malacañang bilang isa sa mga Most Child Friendly Highly Urbanized City sa pungsod.
Sa Good Morning Philippines Program, ginpahayag ni Iloilo City Councilor Alan Zaldivar, chairman sang Committee on Health, Livelihood and Cooperative kag Women and Family Relations, nga isa ka ‘milestone’ ang nasambit nga pasidungog bangud nga mismo si Presidente Rodrigo Duterte ang naghatag kadungan sang awarding ceremony sa Malacañang.
Suno kay Zaldivar, wala nangin mahapos ang preparasyon bangud nga sang 2018 pa nag-umpisa ang pagplastar sang mga programa nga nagakadapat nga ipatuman agud nga makabig nga child friendly ang syudad sang Iloilo.
Ginpahayag ni Zaldivar nga sa linibo ka entries halin sa iban nga lugar sa pungsod ang ginsala sang National Council for the Protection of Children, isa ang Iloilo City sa apat ka highly urbanized city nga nakakuha sang pasidungog.
Bisan ang konsehal ang nakibot man sa nasambit nga pasidungog apang iya nga ginakabig nga nagakadapat lamang nga mangin recipient ang syudad sang Iloilo bangud sa ordinansa nga Revised Comprehensive Code of Iloilo City.
