ILOILO CITY – May yara sang minor obstructions sa dalanon ang syudad sang Iloilo.
Ini ang santo sa pinakaulihi nga road clearing validation sang Department of the Interior and Local Government (DILG) Region VI.
Sa interview sang Bombo Radyo kay Charmagne Matta, focal person sang Road Clearing sang DILG Region 6, iya ginpahayag nga kasunod sang validation sa Road Clearing 2.0, ginpaidalom man ang syudad sang Iloilo sa General Community Quarantine (GCQ).
Suno kay Matta, madinalag-on ang ginpatigayon nga road clearing sang Iloilo City Government.
Apang suno sa natungdan, indi man malikawan nga may yara sang magagmay nga sablag sa dalanon sa diin ginpalab-ot na nila ini kay Iloilo City Mayor Jerry Treñas.
Gin-athag naman ni Matta nga wala sila sang passing ukon failing nga score sa Road Clearing.
Ini bangud suno kay Matta, ang mayor nila nga katuyuan amo nga mapasigurado nga nagasunod ang mga Local Government Unit (LGU) sa pagpanghawan sa mga dalanon.
Samtang, gapasalamat naman ang pamunuan sang Task Force on Anti-Squatting and Illegal Structures Unit (ASIS-U) sa pagkooperar sang mga barangay sa syudad sang Iloilo sa pagtuman sang Road Clearing Operation.
Sa interview sang Bombo Radyo kay Mr. Love Joy Hosenilla, pinuno sang ASIS-U, iya ginpahayag nga apisar indi perpekto ang pagpanghawan sang mga dalanon kasunod sang road clearing, kinahangalan nalang sang gamay nga improvement.
Suno kay Hosenilla, matahom tulokon ang syudad sang Iloilo kun wala sang may nagasablag sa dalanon kag wala sang may naga-illegal parking.
Lakip suno sa natungdan sa mga sablag sa dalanon amo ang mga furniture shop sa De Leon St., Iloilo City Proper, mga poste sang kuryente kag kahoy sa Oñate, De Leon, Mandurriao, Iloilo City kag Yulo Drive, Villa Arevalo, Iloilo City.
Dugang pa ni Hosenilla, ginhatagan naman sila sang tatlo ka adlaw sang DILG Region VI agud mahawanan ang tanan nga mga dalanon sa syudad sang Iloilo.
