Nakahanda ang syudad sang Iloilo sa tion nga mag-abot ang i-allocate sang National Government nga Pfizer-BioNTech COVID-19 vaccines.
Sa interview sang Bombo Radyo kay Iloilo City Mayor Jerry Treñas, iya ginpahayag nga nakapirma na sang kontrata ang syudad sa Pharmaceutical company nga Zuellig Pharma sa diin idiritso ang tanan nga Pfizer-BioNTech COVID-19 vaccines nga idonar sa Iloilo City.
Buot silingon suno kay Treñas, wala na sang partisipasyon ang Department of Health Region VI kag ang cold storage facility bangud ang mastore sang nasambit nga mga bakuna, amo ang Zuellig Pharma.
Ginpahayag sang alkalde nga good for 600,000 doses sang COVID-19 vaccines ang mahimo mastore sang syudad sa Zuellig Pharma.
P50 naman ang balor para sa storage sang isa ka dose sang bakuna nga bayaran sang syudad sa amo nga pharmaceutical company.
Matandaan nga suno sa Pfizer, ang preferred storage sang bakuna ang yara lang sa -80 degrees celsius tubtob -60 degrees celsius apang mahimo ini nga ibutang sa cold chain sa sulod sang lima ka adlaw sa 2 tubtob 8 degrees celsius.
