ILOILO CITY- Nagapadayun ang monitoring sang Iloilo City Government sa pagsaka sang kaso sang nabiktima sang dengue hemorrhagic fever.
Sa interview sang Bombo Radyo kay Iloilo City Mayor Jerry Treñas, iya ginpahayag nga wala pa nakasulod ang syudad sa threshold agud makadeklarar sang dengue outbreak apang may yara sang pila ka mga barangay nga nalab-ot na ang required nga threshold.
Suno kay Treñas, ginaplastar na ang iban nga mga kinahanglanon agud madeklarar ang dengue outbreak sa mga barangay nga apektado agud magamit na sang mga ini ang ila calamity fund.
Madayun suno kay Treñas ang plano sang Iloilo City Government nga citywide clean-up drive batok sa dengue sa diin napahibalo na ang tagsa ka mga barangay tuhoy sini.
Gin-engganyo man niya ang tanan nga pumuluyo, opisyales sang city hall civic groups kag societies nga mag-upod sa nasambit nga aktibidad.
Ginatan-aw naman sang alkalde ang pagpahamtang sang comfort rooms sa mga covered gym nga wala pa sang banyo agud maconvert ini bilang evacuation centers kun kinahanglanon.
Ginpasalamatan man ni Treñas ang Bombo Radyo Iloilo sa bulig agud mapahibalo ang mga pumuluyo tuhoy sa ginahimo nga lihok sang Iloilo City Government batok sa dengue lakip na ang pagpangita sang solusyon sa nasambit nga problema.
