SAN JOSE, ANTIQUE – Nagapati ang tag-iya nga ginhandaan sang suspek ang pagpangluthang sa duha ka mga persona sa sulod sang computer shop sa Brgy. Atabay, San Jose, Antique
Ang mga biktima nga napatay amo sanday Ervin James Checa, manager sang computer shop kag si Ana Anacleto nga amo ang kabulig sa balay sang tag-iya nga si Bayani Rivera samtang ang suspek sa pagpangluthang amo si Venom Dio Mangilaya.
Apat naman ka mga persona ang pilason lakip na ang duha ka mga pulis nga sanday Police Staff Sgt. Cyril Valdevieso, Police Staff Sgt. Albert Talidong, lunsay miyembro sang San Jose Municipal Police Station, si Stephen Checa nga correspondent sang isa ka local newspaper kag isa ka sibilyan.
Sa interview sang Bombo Radyo kay Rivera, iya ginpahayag nga ginpaguwa ni Mangilaya ang mga tawo sa sulod sang computer shop kag gintayaan sang armas si Checa kag si Anacleto.
Suno kay Rivera, daw kaangay nga naka full combat gear pa ang suspek bangud sa suksok niya nga panapton kag may lima pa ka mga magazine nga naubos sa pagpalupok.
Gilayon nga nagtawag sang pulis ang utod ni Checa nga si Stephen Checa.
Gintinguhaan pa ni Stephen nga istoryahon ang suspek apang sang nag-abot ang mga pulis sa lugar, gin-kaakig ini sang suspek kag iya gintiro si Stephen sa nawala nga abaga.
Bangud sa kaakig sang suspek, iya man nga gintiro sanday Anacleto kag Ervin Checa.
Gintinguhaan pa kun tani ni Ervin nga pangapinan si Anacleto paagi sa paghakos apang gintiro sila nga duha sang suspek.
Matapos ang pagpangluthang, may lagsanay pa nga natabo tubtob nga nadakpan suspek.
Ginapahayag nga si Mangilaya ang may luyag kay Anacleto apang wala siya ginasapak sang babaye bangud may yara na ini sang nobyo.
Nahibaluan nga ang armas nga gingamit sang suspek sa pagpangluthang ang ginapanag-iyahan sang iya amay kag expired na ang lisensya sini.
Gin turn-over naman sang amay sang suspek ang iya mga armas sa otoridad.
