𝗦𝗔𝗡 𝗠𝗜𝗚𝗨𝗘𝗟, 𝗜𝗟𝗢𝗜𝗟𝗢 — Nagsabat ang nagpakilala nga tag-iya sang duta nga nahamtangan sang ginsiraduhan nga alagyan sa Sitio Unas, Brgy. Sta. Cruz, San Miguel, Iloilo.
Ini kasunod man sang pagreklamo ni Florante Acebuque nga ginpasirado ang ila nga alagyan.
Sa interview sang Bombo Radyo kay Roberto Salarda, tag-iya sang duta nga ginpasirado, iya ginpahayag nga lunsay kabutigan ang una nga ginsaysay ni Acebuque sa kahanginan.
Suno kay Salarda, wala sang kahilabtanan si Femie Montaño sa duta bangud legal nga nakapangalan sa iya ang titulo sang lupa.
Ginklaro man ni Salarda nga siya ang personal nga nagpasirado sang alagyan, bangud sa pagpasarahi sang pamilya Acebuque sang ginapangabuhian sini nga puno sang lomboy.
Diri kag nag-ugat ang indi pag-intidihanay sa ila nga duha nga bahin, rason man nga ginpatawag sini ang pamilya Acebuque sa ila barangay.
Sa amo nga tinion, ginkasugtan nga magbayad sang P10,000 ang pamilya Acebuque bilang bayad sa kahalitan nga ila natuga sa pagpasarahi sang kahoy.
Apang naghayo ang pamilya Acebuque nga P2,000 lang ang ila masarangan nga bayaran, rason nga nagsugot man ang natungdan.
Wala naman nakabayad sang balor P2,000 ang mga Acebuque, rason nga napilitan si Salarda nga siraduhan ang iya ginapanag-iyahan nga alagyan kag buksan lang kuntani ini kun makabayad na ang pamilya Acebuque.
